Abahanzi bazitabira ibitaramo bya Iwacu Muzika Festival 2026 bunamiye abazize Jenoside yakorewe Abatutsi mu 1994, basura Urwibutso rwa Jenoside rwa Nyanza ya Kicukiro.

Ku gicamunsi cyo kuri uyu wa kabiri tariki ya 14 Mata 2025 nibwo abahanzi bazaririmba muri iri serukiramuco ry’uyu mwaka barimo Kevin Kade, Davis D, Kenny Sol, Bushali, Marina, Rosskana na Chriss Eazy bashyize indabo ku mva zishyinguyemo inzirakarengane ziruhukiye muri urwo rwibutso.

Iki gikorwa cyabaye mbere y’uko batangira urugendo rw’ibitaramo bazazengurukamo igihugu, kikaba cyari kigamije kubibutsa amateka no kubasaba gukomeza gutanga ubutumwa bwubaka ubumwe n’amahoro binyuze mu bihangano byabo.

Ibitaramo bya Iwacu Muzika Festival bizatangira ku wa 20 Kamena 2026, bisozwe ku wa 1 Kanama 2026, bikazenguruka imijyi irindwi irimo Huye, Ngoma, Nyagatare, Karongi, Muhanga, Musanze na Rubavu. Ni ku nshuro ya karindwi iri serukiramuco rigiye kuba, rikomeje kwaguka mu rwego rwo kwegera abaturage benshi kurushaho.

Ku nshuro ya mbere, aka karere ka Karongi nako kazagerwamo n’ibi bitaramo, ibintu ubuyobozi bwa East African Promoters (EAP), butegura iri serukiramuco buvuga ko ari imwe mu ngamba zo kugeza imyidagaduro ku baturage bo hirya no hino mu gihugu.

Ubuyobozi bwa EAP bwatangaje ko buri mwaka bagerageza guhinduranya uturere ibi bitaramo biberamo hagamijwe gutanga amahirwe angana ku banyarwanda bose yo kwishimira umuziki w’imbere mu gihugu.

Umwaka ushize, ibi bitaramo byabereye mu turere turimo Musanze, Gicumbi, Nyagatare, Ngoma, Huye na Muhanga, aho byasimbuye utundi turere nka Rusizi na Rubavu.

Abahanzi bari mu bitaramo bya Iwacu na Muzika Festival basuye Urwibutso rwa Jenoside rwa Nyanza ya Kicukiro

)