Mu gitaramo cy’amateka cyo kwizihiza imyaka 10 umuhanzi Bruce Melodie amaze mu muziki w’u Rwanda cyitabiriwe n’abantu benshi barimo abamotari batunguranye mu myambaro yabo y’akazi.

Cyari igitaramo cyo kwizihiza imyaka 10 umuhanzi Bruce Melodie amaze mu muziki ’10YearsofBruceMelodie’, kikaba kitabiriwe n’umubare mwinshi w’abamotari aho uyu muhanzi yari yatanze amatike 1000 kuri bo.

Iki gitaramo cyabereye muri Kigali Arena aho cyari kitabiriwe n’abantu benshi.

Inganzo Ngari niyo yabanje ku rubyiniro isusurutsa abantu, yakurikiwe na Papa Cyangwe waririmbye indirimbo ze zikunzwe zirimo ’Kuntsutsu’ n’izindi, uyu muhanzi akaba yakurikiwe na Alyn Sano.

Hahise hakurikiraho umuhanzi Niyo Bosco wakirijwe amashyi menshi y’urufaya yamaze hafi iminota 5. Yahereye ku ndirimbo ye ’Ubigenza Ute’ aho abafana be bamufashije kuyiririmba.

Yahise akurikizaho Piyapuresha yatumye abari bahari bose bajya ibicu, yasoreje ku ndirimbo ye ’Seka’.

Hari hatahiwe abakunzi ba Hip Hop, hahise hinjira Bull Dogg yinjirira ku gitero cye mu ndirimbo ’Kamwe’ yahuriyeho n’abandi bahanzi.

Asoje yahise abwira abari aho ko bagiye kuririmba indirimbo ’Old School’ iri kuri Album ye nshya ’Kemothelapy’, yahise akurikizaho ’Nk’umusaza’ yishimiwe na benshi, akurikizaho ’Sinema’ asoreza ku ndirimbo yakoranye B Trey aho yahise amutumira ku rubyiniro.

Yakurikiwe na Mike Kayihura wasusurukije abantu mu ndirimbo ze zitandukanye zirimo ’Tuza’ yakiriwe neza n’abiganjemo igitsina gore.

Umuhanzi Christopher ukunzwe cyane mu ndirimbo z’urukundo ni we wakurikiyeho aho yakirijwe amashyi menshi, yahereye ku ndirimbo ye ’Byanze’ akurikizaho ’Iri Joro’ yahugurukije abantu benshi akurikizaho ’Ijuru Rito’, ’Agatima’ asoreza ku ndirimbo ye nshya ikunzwe cyane muri iyi minsi ’Micasa’ yatumye n’abari bicaye bahaguruka.

MC Tino wari umushyushyarugamba yatumiye Nkusi Arthur ku rubyiniro ashyushya abantu mbere y’uko aha ikaze Bruce Melodie.

Yabanjirijwe n’itsinda rya Symphony Band ryacurangiye abahanzi bose baje baririmbye uretse Mike Kayihura.

Kuri iyi nshuro ryatunguranye riza mu myambaro na mask bimenyerewe muri filime ya Squid Game ikunzwe muri iyi minsi.

Saa 20:45’ zibura umunota umwe nibwo Bruce Melodie yageze ku rubyiniro yakirwa neza cyane, yahereye ku ndirimbo ze za kera zirimo ’Tubivemo’, ’Inkovu’, ’Indorerwamo’, ’Ntujya Uhinduka’, ’Ndakwanga’, ’Uzandabure’ yishimiwe na bantu benshi.

Yakurikijeho indirimbo ’Ntundize’ yasohoye muri 2014, ’Tutaberanye ’ yasohotse 2016, ’Complete Me’ nayo ya 2016 yafashijwe n’abakunzi be kuyiririmba.

Nyuma yo kuririmba indirimbo Hello yakoranye na Fille, yafashe akaruhuko gato aha urubyiniro umusore n’inkumi bacinya akadiho basusurutsa abari aho.

Yagarutse mu ndirimbo ’Ikinya’ yakunzwe cyane maze abari muri Arena si ukuyibyina karahava.

Uyu muhanzi yakomeje gususurutsa abakunzi be aho atanabahaye umwanya wo guhumeka, ni mu ndirimbo nka Tuza yakoranye na Alliani, ’Bucece’ n’izindi.

Saa 21:47 nibwo bwa mbere yafashe umwanya aganiriza abari baje kumushyigikira, yibukije abantu Jay Polly aho yavuze ko n’ubwo yapfuye agihari.

Yagize ati “Muri uru rugendo rw’umuziki nahuriyemo n’abantu benshi cyane, ariko uyu munsi ndatinda ku bahanzi, nahuye na Jay Polly. Nahuye na Jay Polly ariko nta hantu yagiye, mbumvishe ko agihari?”. Yahise aririmba indirimbo ‘Hishamunda’ bakoranye byatumye azamura amarangamutima ya benshi bari muri Kigali Arena.

Irangiye yahise ahamagara umuhanzi Ama G The Black umwe mu bo batangiranye, baririmbana agace gato k’indirimbo bakoranye ‘Twarayarangije”, byanagaragaje ko nta kibazo kiri hagati yabo, ni nyuma y’uko bari bamaze igihe bumvikana mu itangazamakuru nk’abantu bafitanye ikibazo.

Yahise akurikizaho indirimbo ‘Ikinyarwanda’ yakoranye na Riderman, yabanje kuyiririmba wenyine, igeze ku gitero cya Riderman, uyu muraperi benshi bakekaga ko adahari yahise atungurana ku rubyiniro barayirimbana.

Irangiye Melodie yagize ati “Nakuze ndi umufana wa Riderman, none uyu munsi duhagaze hamwe, murumva atari igitangaza?"

Bahise bakurikizaho n’indi bakoranye yitwa ‘Nta kibazo’.

Bruce Melodie yahise ava ku rubyiniro asigira Riderman umwanya ngo ataramire abakunzi be, yahereye kuri ‘Holo’ yatumye benshi basimbuka. Yahise asaba abakunzi be kuririmbana na we indirimbo ze zakunzwe ziganjemo iza kera nka ’Igicaniro’, ’Inkoni’, ’Rutenderi’ n’izindi.

Yahise aha umwanya Kaligombe, umuhanzi ukizamuka wize umuziki ku Nyundo usanzwe umufasha iyo ari ku rubyiniro.

Bahise baha umwanya Bruce Melodie wahise ugirwa Brand Ambassador wa Primus.

Igitaramo cyahise gihindura isura, abantu bajya mu kirere, ni nyuma y’uko uyu muhanzi yahise atangira kuririmba indirimbo ze za vuba zikunzwe cyane zirimo Katerina, Abu Dabi.

Byahumiye ku mirari ubwo yari ageze ku ndirimbo ze zakunzwe na benshi ahanini kubera imyandikire n’injyana yazo aho bamwe bazishinje kubamo ibishegu.

Yahereye kuri ’Saa Maya’ akurikizaho ’Ikinyafu’ yakoranye na Kenny Sol wahise umusanga ku rubyiniro bakayiririmbana.

Yakurikijeho ’Katapila’ yakunzwe cyane, ’Henzapu’, akurikizaho ’Ubushyuhe’ yakoranye na Dj Pius muri 2020, yanamusanze ku rubyiniro barayiririmbana’ indirimbo yanditse amateka yakoranye na Sunny muri 2019 yitwa ’Kungola’ niyo yari itahiwe.

Uyu muhanzi akaba yasoreje ku ndirimbo Bado yumvikana ashimiramo abantu bose bamufashije mu muziki we.

Yasoje igitaramo ashimira abahanzi bose bamufashije, abafana baje kumushyigikira n’abandi bose bamuteye ingabo mu bitugu.

Uyu muhanzi yari yatanze amatike 1000 ku bamotari bakaba bari baje kumufana

Umuhanzi Papa Cyangwe ni we wabimburiye abandi ku rubyiniro

Alyn Sano ni we wakurikiye Papa Cyangwe

Christopher yasusurukije abakunzi be

Abantu bo bari benshi baje kumushyigikira

Mike Kayihura

Benshi byabarenze bitewe n'uburyohe bw'igitaramo

Bull Dogg yaryohereje abakunzi ba Hip Hop

Niyo Bosco ni umwe mu bahanzi beretswe urukundo rwinshi cyane

Symphony Band yaje mu myambaro imenyerewe muri Squid Game

Bruce Melodie yageze ku rubyiniro ategerejwe n'abantu benshi

Melodie yashimishije abafana bataha banyuzwe

Abantu banyuzwe n'iki gitaramo

Bruce Melodie yakoze amateka

AMAFOTO: IGIHE

)