Ibitego bya Bizimana Yannick na Mushimiyimana Mohammed bifashije APR FC kubona intsinzi ya 2-1 imbere ya Sunrise FC yatsindiwe na Yafesa Mubiru ikaza no kubona umutuku.

Wari umukino wa gishuti wagombaga gufasha amakipe yombi kwitegura umwaka w’imikino wa 2020-2021 aho shampiyona izatangira ku wa 4 Ukuboza 2020, ariko mu mpera z’uku kwezi APR FC ifite umukino na Gor Mahia muri CAF Champions League.

APR FC yakinnye uyu mukino idafite abakinnyi 6 bari mu ikipe y’igihugu Amavubi.

Igice cya mbere cy’umukino mu minota 15 ya mbere APR FC yarushije Sunrise FC ubona ibonana mu kibuga neza.

Ku munota wa 16 iba yabonye igitego ariko ishoti Buregeya yateye umunyezamu Shaolin arikuramo.

Nyuma y’iyi minota Sunrise FC nayo yatangiye gukina ndetse irasatira ariko kureba mu izamu rya Rwabugiri Umar bigora ba rutahizamu barimo umugande Hood na Niyibizi Vedaste kuko ubwugarizi bw’iyi kipe bwarimo Prince na Placide butaboroheye.

Ku munota wa 27 Nizeyimana Djuma yahushije igitego cyabazwe nyuma yo gucika ubwugarizi bwa Sunrise ariko ateye umupira unyura hanze gato y’izamu.

Ku burangare bwa ba myugariro ba Sunrise FC, ku munota wa 37 Bizimana Yannick yaboneye APR FC igitego cya mbere. Igice cya mbere kirangira ari 1-0.

Mu gice kabiri APR FC yasatiriye cyane ndetse yari yanakoze impinduka havamo abakinnyi barimo Ruboneka, Placide, Bukuru na Yannick Bizimana hinjiramo Lague, Danny, Yunusu na Keddy.

Aba bakinnyi bafashije cyane APR FC gusatira cyane cyane Lague wanyuraga ku ruhande rw’ibumoso, yahaye akazi ubwugarizi bwa Sunrise FC ndetse anabona amahirwe menshi ariko asanga umunyezamu ahagaze neza.

Sunrise nayo ntiyari yicaye yanyuzagamo igasatira ishaka kwishyura igitego yatsinzwe, yaje kukishyura ku munota wa 76 gitsinzwe na Yafesa Mubiru, rutahizamu mushya w’umugande iyi kipe iheruka gusinyisha, yagiye mu kibuga asimbura Wangi Pius.

Ku munota wa 90 Mugabo Emmy wa Sunrise FC yabonye ikarita itukura, ni nyuma yo guhabwa ikarita y’umuhondo kubera kwanga gutera umupira akabwira nabi umusifuzi akamwongera indi.

Kuri uyu munota Mushimiyimana Mohammed yaje kubonera APR FC igitego cya kabiri ku mupira wari uvuye muri koruneri utewe na Nsanzimfura Keddy. Umukino warangiye ari 2-1.

)