Nyuma yo gukurwa ku kibuga mu mbangukiragutabara(Ambulance), Muhire Kevin yasubiye mu mwiherero wa Rayon Sports aho uyu munsi nta gihindutse agomba kunyuzwa mu cyuma.

Ku munsi w’ejo ku wa Gatatu tariki ya 5 Gicurasi 2021 ku isaha ya saa 15:00’, kuri Stade Amahoro ikipe ya Kiyovu Sports yari yakiriye Rayon Sports mu mukino w’umunsi wa kabiri w’itsinda B rya shampiyona y’u Rwanda umwaka w’imikino wa 2020-2021.

Muhire Kevin uherutse kugurwa na Rayon Sports, yari mu bakinnyi 11 umutoza Guy Bukasa yagiriye icyizere cyo kubanza mu kibuga.

Uyu mukinnyi yaje kugira ikibazo cy’imvune ikomeye yahuye nayo ku munota 45 mbere y’amasegonda macye ngo umusifuzi arangiza igice cya mbere.

Umurundi Bigirimana Abedi yaje kumukandagira mu ivi ry’iburyo ku buryo abandi bagiye mu rwambariro we agasigara mu kibuga yitabwaho n’abaganga.

Nyuma yo kugaragara ko imvune ye imeze nabi, uyu mukinnyi yahise yihutanwa mu mbangukiragutabara(Ambulance) aho yahise ajyanwa mu bitaro bya CHUK.

Amakuru ISIMBI yamenye ni uko nyuma yo guhabwa ubuvuzi bw’ibanze yahise ajyanwa mu Nzove aho iyi kipe ikorera umwiherero, uyu munsi akaba agomba kunyuzwa mu cyuma kugira barebe uko imvune ye imeze ndetse hamenyekane n’igihe izamara.

Umukino Kevin Muhire yavunikiyemo ukaba warangiye ku ntsinzi ya Kiyovu Sports y’ibitego 3-2.

Yakandagiwe mu ivi ry'iburyo

Yahise asohorwa mu kibuga yihutanwa mu mbangukira gutabara

)