Igikombe cy’u Burayi cya 2024 (Euro 2024) cyari kimaze iminsi kibera mu Budage cyagukanywe na Espagne itsinze u Bwongereza ku mukino wa nyuma wabereye mu Mujyi wa Berlin kuri Olympiastadion ibitego 2-1.
Espagne yahabwaga amahirwe yo kwegukana igikombe cy’u Burayi cya 2024 (EURO 2024), n’ubundi ni yo yinjiye mu mukino neza.
Bayobowe n’ubusatirizi bwa bo nka Lamine Yamal na Williams, Espagne yagerageje gushyira igitutu ku bwugarizi bw’u Bwongereza ariko babyitwaramo neza n’umunyezamu Pickford yari ahagaze bwuma.
Muri iki gice cya mbere, u Bwongereza wavuga ko amahirwe bwaremye afatika cyangwa kugera imbere y’izamu rya Espagne bifatika byari ku munota wa 17 ubwo Bukayo Saka yahinduraga umupira imbere y’izamu ariko Espagne ikawohereza muri koruneri itagize icyo itanga. No ku munota wa 45, ku makosa ya Carvajal, Jude Bellingham yamwambuye umupira awuhindura imbere y’izamu, Kane ateye Rodrygo aritambika.
Ku ikosa Williams yari akoreye Walker, u Bwongereza bwahawe kufura yatewe neza maze Foden atera mu izamu ariko umunyezamu arawufata. Amakipe yagiye kuruhuka ari ubusa ku busa.
Espagne yagarukanye imbaraga mu gice cya kabiri maze ku munota wa 47 ibona igitego cya mbere cyatsinzwe na Nico Williams ku mupira yari ahawe na Lamime Yamal.
U Bwongereza bwagiye bukora impinduka nka Ollie Watkins ku munota wa 61 yasimbuye Harry Kane na Kobbie Mainoo ku munota wa 70 yahaye umwanya Cole Palmer.
Izi mpinduka zagize akamaro kuko ku munota wa 73 Cole Palmer yashyuriye u Bwongereza ku mupira yari ahawe na Jude Bellingham.
Espagne ntiyacitse intege yakomeje gusatira maze ku munota wa 86, Mikel Oyarzabal wari winjiye mu kibuga asimbura Alvaro Morata yatsindiye Espagne igitego cya kabiri. Umukino warangiye ari 2-1 maze Espagne yegukana igikombe cya Euro 2024.
Ibitekerezo