Ibihugu 17 birimo n’u Rwanda nibyo byamaze kwemeza ko bizitabira igikombe cy’Afurika cya Volleyball mu bagabo n’abagore kizabera mu Rwanda mu kwezi gutaha.
Tariki ya 2 Kanama 2021, nibwo Impuzamashyirahamwe y’Umukino wa Volleyball muri Afurika (CAVB) yatangaje ko aya marushanwa azaba tariki ya 5 kugeza 20 Nzeri 2021, azabera i Kigali muri Kigali Arena.
Iyi mikino ikaba izatanga itike y’igikombe cy’Isi cya 2022 kizabera mu Burusiya. Iki gikombe cy’Afurika kizabera mu Rwanda kikaba kizitabirwa n’amakipe y’ibihugu bya Afurika aho kwiyandikisha bizarangira ku wa 6 Kanama 2021.
Kwindayikisha byarangiye ku munsi w’ejo hashize tariki ya 6 Kanama, mu bagabo ibihugu 16 hakiyongeraho n’u Rwanda ruzakira iki gikombe, nibyo bizaba bihatanira iki gikombe.
Harimo u Rwanda, Burkina Faso, Cameroon, DR Congo, Cote d’Ivoire, Misiri, Ethiopia, Guinea, Mali, Morocco, Niger, Nigeria, Tanzania, Tunisia, Uganda na Zambia
Mu bagore hazaza ibihugu 12, u Rwanda, Cameroon, DR Congo, Cote d’Ivoire, Misiri, Ethiopia, Gambia, Guinea, Morocco, Nigeria, Tanzania na Tunisia.
Amakuru avuga ko igihugu cya Cameroon kizaza mbere ho ibyumweru 2 kuko yifuza gukina umukino wa gicuti n’u Rwanda.
U Rwanda amakipe yombi(abagabo n’abagore) batangiye umwiherero bitegura iyi mikino y’igikombe cy’Afurika.
Mu bagabo, ikipe y’u Rwanda iheruka kwitabira iyi mikino ya Afurika ubwo yaberaga muri Misiri muri 2017 aho yasoreje ku mwanya wa gatandatu.
Mu bagore, ikipe y’u Rwanda yaherukaga gukina iri rushanwa Nyafurika muri 2011 ubwo ryari ryabereye muri Kenya hashakishwaga itike y’Igikombe cy’Isi. Aha, iyi kipe y’u Rwanda yasoreje ku mwanya wa cyenda mu makipe icyenda.
Iyi mikino ikaba yagombaga kubera muri Tunisia ariko iki gihugu kikaba cyaratangaje ko cyo cyiteguye kwakira irushanwa ry’abagabo gusa, ni mu gihe CAVB yo yashakaga ko yakirwa n’igihugu kimwe niko kuyizana mu Rwanda.
Ibitekerezo