Isaha n’isaha, Umubiligi wafashije Rayon Sports kwandika amateka yo kugera mu matsinda y’imikino Nyafurika, Ivan Jacky Minnaert aratangazwa nk’umutoza w’agateganyo wa Gorilla FC.

Ku mugoroba w’ejo hashize ni bwo ikipe ya Gorilla FC yatandukanye n’uwari umutoza mukuru wa yo, Gatera Moussa, Manirakiza Gervais wari umutoza wungirije ndetse na Kalisa François wari ushinzwe kongerera imbaraga abakinnyi.

Birukanywe nyuma y’uko mu mikino 5 iheruka ya shampiyona yose bayitsinzwe nta nota na rimwe bakuyemo.

Amakuru avuga ko aba batoza bagomba gusimbuzwa Umubiligi Ivan Jacky Minnaert umaze iminsi mu Rwanda aho nta kipe yari afite.

Minnaert aheruka mu Rwanda muri 2018 ubwo yari umutoza mukuru wa Rayon Sports akaza kwandika amateka yo kuyihesha itike yo kujya mu matsinda ya CAF Confederation Cup ari na yo kipe rukumbi mu Rwanda yabikoze.

Ivan Minnaert aheruka gutandukana na Djoliba AC yo muri Mali. Uretse Rayon Sports mu Rwanda yanatoje Mukura VS. Yatoje kandi amakipe nka AFC Leopards yo muri Kenya, Al Ittihad Tripoli yo muri Libya n’izindi.

Ivan Minnaert nta gihindutse aragirwa umutoza wa Gorilla FC

)