Umwaka umwe wari uhagije kugira ngo rutahizamu w’umunyarwanda ukinira ikipe ya Simba SC, Meddie Kagere akureho uduhigo twa ba rutahizamu bose batsinze ibitego byinshi muri sampiyona ya Tanzania mu myaka 10 ishize aho ari we watsinze ibitego byinshi, 23.

Buri kipe iyo ikina iba ishaka intsinzi y’amanota 3 ariko ibyishimo byinshi bitahanwa n’umukinnyi watsinze igitego, ni yo mpamvu ba rutahizamu baba bashaka gutsinda kugira ngo ku mpera z’umwaka w’imikino uwahize abandi yatsinze ibitego byinshi azabihemberwe.

Mu mwaka we wa mbere muri shampiyona ya Tanzania, Meddie Kagere yahise aba rutahizamu watsinze ibitego byinshi muri iyi shampiyona mu myaka 11.

Mbere ya Kagere, muri iyi myaka 10 ishize ba rutahizamu bagejeje ibitego 20 ni babiri gusa, Amiss Tambwe watsinze ibitego 21 na Emmanel Okwi watsinze ibitego 20.

Meddie Kagere yinjiye muri Simba SC umwaka ushize wa 2018 avuye muri Gor Mahia, akaba amaze kuyikinira umwaka umwe w’imikino wa 2018-2019 ahita anakuraho uduhigo twa ba rutahizamu bose batsinze ibitego byinshi muri iyi shampiyona mu myaka 10 ishize.

Dore abatsinze ibitego byinshi mu myaka 11 ishize

Uwamaka w’imikino wa 2008/09: Boniface Ambani, ni umunyakenya wahagaritse gukina, yakiniraga Young Africans yatsinze ibitego 18.

Uwamaka w’imikino wa 2009/10: Mussa Mgosi wakiniraga ikipe ya Simba SC, akomoka muri Tanzania nawe yatsinze ibitego 18. Ubu asigaye atoza ikipe ya Simba SC y’abato ndetse n’iyi bakobwa.

Uwamaka w’imikino wa 2010/2011: Mrisho Ngasa na we yatsinze 18 akinira Azam FC, ubu akinira Young Africans.

Uwamaka w’imikino wa 2011/2012: John Bocco kapiteni wa Simba SC kuri ubu, yatsinze ibitego 19, icyo gihe yakiniraga Azam FC.

Uwamaka w’imikino wa 2012/2013: Kipre Tchetche wakiniraga ikipe ya Azam FC yatsinze ibitego 17.

Uwamaka w’imikino wa 2013/2014: Amiss Tambwe, umurundi wakiniraga ikipe ya Simba SC yatsinze ibitego 19.

Uwamaka w’imikino wa 2014/2015: Umutanzaniya, Simon Msuva ukinira ikipe ya Difaa El Jadida muri Maroc, yatsinze ibitego 17.

Uwamaka w’imikino wa 2015/2016: Amiss Tambwe yakiniraga Young Africans, yabaye umukinnyi wa mbere wagejeje ibitego 20 kuko yatsinze 21.

Uwamaka w’imikino wa 2016/2017:Simon Msuva ari kumwe na Young Africans yatsinze ibitego 14.

Uwamaka w’imikino wa 2017/2018: Umugande wakiniraga ikipe ya Simba SC, Emmanuel Okwi yatsinze ibitego 20.

Umwaka w’imikino wa 2018-2019, nibwo Meddie Kagere yinjiye muri iyi shampiyona, ntibyamugoye kwigarurira imitima y’abakunzi ba Simba SC kuko yatangiye atsinda, byaje no gutuma arangiza umwaka w’imikino ayoboye abandi ba rutahizamu batsinze ibitego byinshi aho yatsinze ibitego 23, aba rutahuzamu watsinze ibitego byinshi mu myaka 11 ishize.

Ubu Kagere niwe watsinze ibitego byinshi mu mwaka umwe, mu myaka 11 iheruka

Emmauel Okwi umwe mu bakinnyi babashije gutsinda ibitego 20 muri shampiyona ya Tanzania

Amiss Tambwe nawe yatsinze ibitego 21

)