REG BBC ihagarariye u Rwanda mu irushanwa rya Basketball Africa League 2022, yatsinze US Monastir amanota 77-74 ihita ibona itike y’imikino ya nyuma ya BAL izabera i Kigali.

Wari umukino wa kane wa REG BBC wo mu Itsinda rya mbere “Sahara Conference” wabereye muri Dakar Arena kuri uyu wa Mbere tariki ya 14 Werurwe 2022.

Iri jonjora ririmo kubera muri Senegal, REG BBC yaritangiye neza itsinda imikino yayo 2 (SLAC na AS Salé) ariko yaje gutsindwa na DUC mu mukino uheruka, yagiye gukina uyu mukino ibizi neza ko kuwutsinda uhita ubahesha itike ya 1/4 ndetse bagahita babona itike y’imikino ya nyuma ya BAL izabera i Kigali.

Agace ka mbere REG BBC yagatsinzwe ku manota 21-26 ya Monastir, akaba kabiri nako yagatsinzwe 15-16.

Abasore ba REG BBC baje mu gace ka gatatu bashaka gukuramo ikinyuranyo cy’amanota 6 bari bashyizwemo, maze abakinnyi barimo Pitchou wigaragaje cyane, bafashije REG BBC gutsinda agace ka gatatu bari imbere n’amanota 20 -13 ya US Monastir, bakomerejeho n’agace ka nyuma bagatsinda ku manota 21-19, umukino warangiye ari 77 ya REG BBC kuri 74 ya US Monastir.

Michael Andre wa US Monastir ni we watsinze amanota menshi aho yatsinze 23, Pitchou wa REG BBC atsinda 16.

REG BBC yamaze kubona itike, izasoreza imikino yayo kuri Club Ferroviário da Beira ku munsi w’ejo ku wa Kabiri.

Kaje Elie agerageza gushyira umupira mu nkangara

Wari umukino utoroshye

Pitchou yagoye cyane US Monastir

Dieudonne Ndayisaba ashaka gucikana umupira abakinnyi ba US Monastir

)