REG VC yegukanye igikombe cya shampiyona ya 2022-23 nyuma yo gutsinda APR VC amaseti 3-1.

Guhera ejo ku wa Gatandatu n’uyu munsi ku Cyumweru hakinwaga agace ka nyuma k’iyi shampiyona mu bagabo no mu bagore aho yari yaramaze kwegukanwa na APR WVC.

REG VC yagiye gukina agace ka nyuma iyoboye urutonde isabwa gusa kugera ku mukino wa nyuma w’agace gasoza iyi shampiyona.

Nyuma yo kwitwara neza mu ijonjora, 1/2 yahahuriye na APR VC maze iyitsinda amaseti 3-1 (25-18, 17-25, 25-19 na 25-18).

REG VC yahise yegukana igikombe cya shampiyona kuko Gisagara nubwo yayitsinze ku mukino wa nyuma (amaseti 3-1), bahise banganya amanota ubundi barebwa ikipe yegukanye uduce twinshi ari yo REG VC yegukanye 4 mu 8.

Byatumye kandi umutoza wa REG VC Kwizera Pierre Pierre Marshall abasha kwegukana igikombe cya shampiyona cye cya mbere nk’umutoza kuva yasezera mu ikipe y’igihugu nk’umukinnyi 2017.

REG VC yegukanye igikombe ikaba yahembwe miliyoni 2 z’amafaranga y’u Rwanda, Gisagara ya kabiri yegukanye miliyoni 1.5 ni mu gihe APR VC ya 3 yegukanye miliyoni imwe y’amafaranga y’u Rwanda.

Mu Bagore agace ka nyuma kagiye gukinwa APR WVC ibizi ko ari yo igomba gutwara igikombe nyuma yo kwitwara neza mu gace ka 7.

FOREFRONT na RRA VC zahuriye ku mukino wa nyuma zishakamo ikipe ya 2, maze FOREFRONT itsinda RRA amaseti 3-1 (18-25, 25-20, 25-19 na 25-19).

APR WVC yahawe igikombe na sheki ya miliyoni 2, FOREFRONT yahawe miliyoni 1.5 mu gihe RRA ya 3 yahawe miliyoni imwe y’amafaranga y’u Rwanda.

REG VC yatwaye igikombe itsinze APR VC

Marshall yanditse amateka

Mutabazi Elie utoza APR VC ntiyahiriwe

Byari ibyishimo kuri REG VC yegukanye igikombe cya shampiyona

RRA yegukanye umwanya wa 3 mu bagore

FOREFRONT yegukanye umwanya wa 2

Byari ibyishimo kuri APR WVC yegukanye igikombe cya shampiyona

Mu bagabo APR yabaye iya 3

Gisagara yegukanye umwanya wa 2

)