Minisiteri ya Siporo yamaze gufata umwanzuro wo guhagarika shampiyona y’umupira w’amaguru mu Rwanda kubera ikibazo cya Coronavirus, FERWAFA itegekwa gupimisha amakipe yose mbere y’uko abakinnyi basurbira mu ngo zabo.

Ni mu itangazo ryashyizweho umukono na Minisitiri wa Siporo, Munyangaju Aurore Mimosa, aho rivuga ko ari icyemezo cyafashwe hashingiwe ku bugenzuzi bwakozwe, bukagaragaza ko hari aho amakipe acumbitse abakinnyi basohoka cyangwa bagasurwa, kandi amabwiriza yo kwirinda COVID-19 atabyemera.

Ibi kandi bikagendana n’uko raporo igaragaza ko ubwandu mu makipe bukomeje kwiyongera.

Muri iri tangazo rya Minsiteri kandi, rivuga ko amakipe atemerewe kuva aho acumbitse batabanje gupimwa iki cyorezo kandi amafaranga yo gupimwa akaba agomba gutangwa na FERWAFA.

Ibi bibaye nyuma y’uko shampiyona ndetse n’amarushanwa y’umupira w’amaguru muri rusange bisubukuwe hagiye hagaragara ubwandu bwa hato na hato bwa Coronavirus nko mu Gushyingo nibwo Komite Nyobozi ya FERWAFA yahanishije ikipe ya AMAGAJU FC kuvanwa mu irushanwa rya Playoffs, nyuma yo guhamwa n’uburangare bwatumye abakinnyi 11 bayo bandura icyorezo cya COVID-19.

Ubu abakinnyi 14 ba Rayon Sports bari mu kato aho banduye icyorezo cya Coronavirus.

Ku kijyanye n’igihe shampiyona isubitswe hamaze gukinwa imikino y’umunsi wa 3 izasubukurirwa, Minisiteri yavuze ko bizatanazwa mu gihe nyacyo.

Itangazo rya Minisiteri ya Siporo

Shampiyona umwaka w'imikino 2020-2021 yahagaritswe hamaze gukinwa umunsi wa 3

)