Umutoza wa APR FC, Thierry Froger yavuze ko ataremeza neza niba Mugisha Gilbert na Shaiboub batazakina umukino wa Rayon Sports kubera imvune.

Ku wa Mbere w’iki cyumweru nibwo Umunya-Sudani, Sharaf Eldin Shaiboub Ali Abdulrahman yagiriye ikibazo cy’imvune mu myitozo itegura umukino wa Rayon Sports uzaba ku munsi w’ejo ku wa Gatandatu.

Ku wa Kabiri na Mugisha Gilbert yagiriye ikibazo cy’imvune mu myitozo itegura uyu mukino, aho yahise ava mu kibuga adasoje imyitozo.

Hari impungenge ku bakunzi ba APR FC z’uko aba bakinnyi bashobora kutazakina kubera izi mvune.

Mu kiganiro n’itangazamakuru cyo kuri uyu wa Gatanu cyagarukaga kuri uyu mukino, umutoza Thierry Froger yavuze ko atarafata umwanzuro kuri aba bakinnyi ariko abimenya uyu munsi.

Ati "abo bakinnyi babiri bagize imvune, Shaiboub yagize imvune mu myitozo ya mbere y’iki cyumweru, Gilbert na we yaje kuvunika ariko imvune yoroshye yaraye atangiye imyitozo yo gukora ku mupira. "

"Shaiboub imvune yagize yari ikomeye uyu munsi nibwo ari bukore imyitozo turebe, nibwo dufata umwanzuro niba azakina ariko umwaka w’imikino ni munini ntabwo twakora ikosa ryo kumuzana atarakira. "

Rayon Sports izakina na APR FC ejo ku wa Gatandatu tariki ya 12 Kanama 2023 mu mukino w’igikombe kiruta ibindi mu gihugu "Super Cup" uzabera kuri Kigali Pelé Stadium.

Shaiboub aracyashidikanyaho

Mugisha Gilbert yatangiye imyitozo

)