Nyuma y’uko ikipe ya Gisagara VC isoje umwaka w’imikino nta mutoza ufite, yamaze gusinyisha Kwizera Pierre [Marshal] amasezerano y’imyaka 2 nk’umutoza mukuru.

Uyu mugabo wari usanzwe ukinira ikipe ya REG VC, yahisemo guhagarika gukina atangira urugendo rw’ubutoza aho yahise ahabwa amasezerano yo gutoza Gisagara VC.

Gisagara VC ntiyahiriwe n’umwaka ushize w’imikino dore ko hagiye hanyuramo abatoza benshi abandi basohoka, bamwe bashinjwaga umusaruro utari mwiza.

Muri shampiyona iyi kipe yatojwe na Ntawangundi Dominique, uyu mutoza yaje kunengwa umusaruro muke ahagarikwa mu mikino y’igikombe cy’Intwari itarangiye, ikipe ifatwa na Ndayikengurukiye Jean Luc watoje umukino wa nyuma batsindwa na UTB.

Imikino nyafurika y’amakipe yabaye aya mbere iwayo iyi kipe yatojwe na Paul Bitoke wahoze ari umutoza w’ikipe y’igihugu.

Irushanwa ry’akarere ka 5 ryabereye mu Rwanda ‘Zone V’ ryatojwe na Viateur waje no kuryegukana atsinze REG ku mukino wa nyuma.

Imikino ya Play Offs, Gisagara yitabaje Elie Mutabazi akaba asigaye ari umutoza w’ikipe y’igihugu aba ari we uyitoza.

Nyuma y’uru runyuranyurane rw’abatoza muri iyi kipe, nk’uko amakuru agera ku kinyamakuru Isimbi abivuga, Kwizera Pierre yamaze gusinyira iyi kipe yahoze anakinira amasezerano y’imyaka 2 nk’umutoza mukuru.

Marshal wakiniye ikipe y’igihugu agasezera muri 2017, yakiniye amakipe atandukanye hano mu Rwanda no hanze yarwo, arimo; Umubano Blue Tigers, Kigali Volleyball Club, APR Volleyball Club, O.M.K Volleyball Cub muri Algeria, INATEK Volleyball Club, Rayon Sports na Gisagara agiye gutoza.

Muri 2017 yasezeye mu ikipe y’igihugu

)