Nyuma y’uko Sarpong ageze mu gihugu cya Tanzania gukinira ikipe ya Yanga, umuyobozi wa GSM yavuze ko basigaje abakinnyi 2 gusa bazaturuka hanze y’iki guhugu bakaba batarimo Rutanga Eric.
Mu mpera za Gicurasi 2020 ni bwo uyu musore ukina ku ruhande rw’ibumoso yugarira yasinyiye Police FC amasezerano y’imyaka 2, bitunguranye muri Kamena bivugwa ko yamaze kwerekeza muri Yanga.
Ku munsi w’ejo ni bwo iyi kipe yakiriye Michael Sarpong yageze muri iki gihugu aho agiye gukinira iyi kipe mu gihe cy’imyaka 2.
Aganira n’itangazamakuru, umuyobozi wa GSM, Kompanyi itera inkunga iyi kipe inayifasha mu byo kugura abakinnyi, Eng. Hersi Said yashimiye abafana uburyo bakomeje gufasha ikipe mu kwiyubaka.
Yagize ati“ndabashimira uburyo bukomeje kudufasha, dukomeje kwiyubaka, uyu munsi nk’uko mubibona twazanye undi rutahizamu Sarpong ukomoka muri Ghana ariko yakinaga mu Rwanda, twishimiye ko turi kumwe na we mu gihe cy’imyaka 2.”
Yakomeje avuga ko batarava ku isoko, basigaje kwakira abakinnyi babiri gusa bazava hanze y’igihugu, gusa muri abo bakinnyi ntibarimoRutanga Eric uheretse gutangaza ko atazi aho ahagaze, ni nyuma y’uko byavuzwe ko yamaze kugurwa n’iyi kipe.
Yagize ati“ubu dusigaje abakinnyi babiri bataragera hano mu gihugu, dufite umukinnyi wo hagati ndetse na rutahizamu bataragera hano, umutoza na we tumutegereje ku wa Mbere Imana n’ibishaka.”
Amakuru avuga ko nyuma yo gusinyisha myugariro wa Tanzania Prisons, Yassin Mustapha bivugwa ko ari yo mpamvu Yanga yahise ikura amaso kuri Rutanga Eric.
Ibitekerezo