Gor Mahia yo muri Kenya izahura na APR FC mu ijonjora ry’ibanze rya CAF Champions League, yamaze kwemeza Sammy ‘Pamzo’ Omollo nk’umutoza w’agateganyo uzayitoza mu mikino nyafurika.

Ibi bije nyuma y’uko uwari umutoza mukuru wayo, Robertinho, CAF igaragaje ko ibyangombwa bye bitamwemerera gutoza imikino nyafurika.

Ku wa Gatanu tariki ya 20 Ugushyingo 2020, CAF yamenyesheje Gor Mahia ko umutoza wayo Robertinho afite License B y’ubutoza yaherewe iwabo muri Brazil ikaba ingana na License C yo ku mugabane w’Afurika bityo ko atemerewe gutoza amarushanwa yayo kuko hatoza ufite License A cyangwa B.

Iyi kipe ikaba yahise ishakisha umutoza w’agateganyo wo kuyifasha muri iyi mikino, maze umuyobozi wa Gor Mahia, Ambroise Rachier, abinyujije ku rubuga rw’iyi kipe, yemeza ko bamaze guhitamo Sammy ‘Pamzo’ Omollo wabaye myugariro wa Gor Mahia ndetse akanatoza Tusker FC, ufite Licence A ya CAF nk’umutoza w’agateganyo.

APR FC niyo izabanza kwakira Gor Mahia ku wa Gatandatu w’iki cyumweru, ni mu gihe umukino wo kwishyura uzaba ku wa 5 Ukuboza 2020.

Sammy Omollo yagizwe umutoza w'agateganyo wa Gor Mahia

)