Ijonjora ry’ibanze rya Miss Rwanda ryabereye i Gikondo mu Mujyi wa Kigali, abafana b’abakobwa bahatanye bitabiriye ku bwinshi baje kubashyigikira.

Mu ihema ryo muri Expo Grounds ahabereye iki gikorwa hari urusaku n’akaruru kadasanzwe, buri muntu witabiriye afite umukobwa ashyigikiye. Benshi bitwaje ibyapa biriho amafoto y’abo bashyigikiye abandi bambaye imyenda iriho amafoto yabo cyangwa amazina.

Iki gikorwa cyatangiye ku isaha ya saa moya z’umugoroba zuzuye, kiyobowe n’aba-MCs Nzeyimana Luckman na Ally Soudy umaze iminsi mike avuye muri Leta Zunze Ubumwe za Amerika.

Akanama nkemurampaka kagizwe na Mutesi Jolly wari kumwe n’abakobwa bahataniye ikamba mu yandi majonjora, Rusaro Carine ukunze kwinjira muri iki gikorwa iyo kigeze ahakomeye n’umunyamakuru wa RBA, Umurerwa Evelyne.

Abakobwa bamaze kwiyerekana buri wese yashyigikiwe mu buryo bukomeye n’abaje kumureba gusa bigeze kuri Mwiseneza Josiane biba akarusho kuko benshi bahanitse amajwi yabo bakamufana birushijeho byerekana imbaraga afite muri iri rushanwa.

Uyu mugoroba urasiga hamenyekanye abakobwa 20 bazakomeza muri iri rushanwa, abandi 17 bakurwemo. Abari butsinde bazahita bajyanwa mu mwiherero uzamara ibyumweru bibiri.

Ubuyobozi butegura iri rushanwa buherutse gutangaza ko umwiherero w’uyu mwaka washyizwemo impinduka zidasanzwe aho mu cyumweru cya nyuma, buri munsi hazajya hasezererwa umukobwa umwe umwe kugeza hasigayemo abakobwa 15 bazagera mu cyiciro cya nyuma.

Abafana bamwe mu bakobwa bahataniye ikamba ni uko baje

Bamwe mu bafana b'abakobwa bagiye bagirana ibisa n'ubushyamirane

Aba bakobwa b'uburanga baje gufana bagenzi babo

Hari abitwaje ibyapa mu gushyigikira abakobwa bahataniye kwinjira mu mwiherero

Hari ugufana bidasanzwe mu gutora abakobwa 20 bazajya mu mwiherero wa Miss Rwanda

Abafana abakobwa bitwaje ibyapa bari kubashyigikira mu buryo nk'ubusanzwe mu mupira w'amaguru

Akanama nkemurampaka muri Miss Rwanda muri uyu mwaka kagizwe n'ab'igitsina gore gusa

Nzeyimana Luckman wo kuri RBA ni we watangije ibi birori

Rusaro Carine yinjiye mu bagize akanama nkemurampaka

Evelyne Umurerwa yinjiye mu bagize akanama nkemurampaka

I Gikondo muri Expo Grounds ahabereye iki gikorwa hari abantu benshi

Ally Soudy ni we uyoboye ibi birori byo gutora abakobwa 20 bazajya mu mwiherero wa Miss Rwanda

Arafata urwibutso rw'ibisubizo by'umukobwa ashyigikiye

Abakobwa batangiye gusubiza ibibazo by'abagize akanama nkemurampaka

Amafoto: Karangwa Gaspard

)