Iradukunda Liliane n’abandi bakobwa basaga ijana bahataniye ikamba rya Miss World bahawe ikaze mu kiganiro bahuriyemo n’umukobwa wabaye Nyampinga w’Isi mu 2016.

Miss World imaze iminsi itandatu itangiye, abakobwa basaga 120 bahatanye uyu mwaka bageze mu Bushinwa guhera tariki ya 8 Ugushyingo 2018 ndetse bahita batangira imyitozo.

Kuri uyu wa Kabiri tariki ya 13 Ugushyingo 2018, abakobwa bose hamwe bagiranye ikiganiro n’itangazamakuru ndetse bahawa amabwiriza yose irushanwa rizagenderaho mu kwezi rizamara.

Ubuyobozi bwa Miss World bwatangaje ko “Abakobwa bose baserukiye ibihugu byabo bahawe ikaze na Nyampinga w’Isi watowe mu 2016 Stephanie Del Valle.”

Muri iki kiganiro n’abanyamakuru kandi hatoranyijwe itsinda rito maze buri mukobwa mu barigize ahabwa umwanya avuga umushinga yakoze wahinduye imibereho y’abo mu gihugu cye.

Nyampinga w'u Rwanda n'uwa Armenia

Kuri uyu wa Gatatu hatangiye icyiciro gikomeye cyo kwerekana impano, abakobwa bose biyerekanye mu myambaro yiganjemo iyerekana imyambarire gakondo ya buri gihugu.

Iki gikorwa cyabaye kibangikiranye n’ikindi gikomeye cya ‘Head to Head Challenge’ cyo gusuzuma ubumenyi bwa buri wese mu bahatanira ikamba.

)