Kapiteni wa APR FC, Jacques Tuyisenge yashimiye Imana nyuma yo kugaruka mu kibuga nyuma y’amezi 3 yari amaze mu mvune

Jacques Tuyisenge yagize imvune mu Kwakira 2021 mu mikino Nyafurika, kuva icyo gihe nta mukino n’umwe yari yagakinnye.

Ku munsi w’ejo hashize ku wa Gatatu ubwo APR FC yari yakiriye Gorilla FC mu mukino w’umunsi wa 13 wa shampiyona y’icyiciro cya mbere umwaka w’imikino 2021-22, Jacques Tuyisenge yakinaga umukino we wa mbere muri iyi shampiyona.

Yinjiye mu kibuga asimbura Nshuti Innocent igice cya kabiri kigitangira, ni we waje gukorerwaho ikosa ryavuyemo penaliti yatsinzwe na Byiringiro Lague.

Nyuma y’uyu mukino warangiye ari 1-0, abinyujije ku rukuta rwe rwa Instagram, Jacques Tuyisenge yashimiye Imana kuba yagarutse mu kibuga nyuma y’amezi 3.

Ati "Nishimiye cyane kugaruka mu kibuga nyuma y’amezi 3. Imana ishimwe. "

Jacques Tuyisenge yagize imvune tariki 16 Ukwakira 2021 ubwo ikipe ya APR FC yakinaga umukino ubanza wa CAF Champions League na Etoile du Sahel umukino wabereye i Kigali.

Jacques Tuyisenge yashimiye Imana nyuma yo kugaruka mu kibuga

Jacques Tuyisenge yari amaze amezi 3 adakina

)