Perezida w’urukiko rw’ibanze muri Uganda yongeye gusubika urubanza rw’umuhanzi w’icyamamare muri Uganda na Afurika akaba n’umunyapolitiki Robert Kyagulanyi Ssentamu uzwi ku izina rya Bobi Wine, rukazasubukurwa ku wa 12 Ukuboza uyu mwaka.
Perezida w’uru rukiko Grace Nahirya yafashe umwanzuro wo gusubika uru rubanza nyuma y’uko David Lule uregwanwa na Bobi Wine atagaragaye mu rukiko kuri uyu wa Mbere tariki ya 28 Ukwakira 2019.
The Citizen dukesha iyi nkuru yanditse ko Bobi Wine n’abandi bantu bane bakurikiranyweho agasuzuguro gakabije ko kutubahiriza amategeko ya Uganda.
Ni ku nshuro ya kabiri uru rubanza rusubikwa nyuma y’uko ubwa mbere rwasubitswe kubera ko Bobi Wine atagaragaye mu rukiko.
Uyu mudepite [Bobi Wine] uhagarariye agace ka Kyadondo na mugenzi we barashinjwa guhuriza hamwe abaturage bakabakoresha inama batabanje kubimenyesha ubuyobozi.
Mu mwaka ushize wa 2018, uyu muhanzi n’abayoboke be bagiye mu muhanda barwanya icyemezo cya leta ya Uganda cyo gusoresha imbuga nkoranyambaga ndetse n’ikoreshwa rya serivisi za ‘Mobile Money’.
Umwunganira mu mategeko, Asuman Basalirwa avugana na Al Jazeera mu 2018 yavuze ko Bobi Wine yatawe muri yombi agashyikirizwa urwego rushinzwe ubugenzacyaha muri Uganda kubera iyo myigaragambo.
Nyuma yo gutabwa muri yombi, Bobi Wine yaciwe amande ndetse anasabirwa igifungo cy’imyaka ibiri.
Uyu muhanzi akaba n’umunyapolitiki, yagiye ashinjwa ibindi byaha bitandukanye birimo guharabika Perezida Museveni.
Bobi Wine yashinze umutwe wa politiki yise “People Power-Our Power” utavuga rumwe n’ubutegetsi bwa Uganda ndetse akaba anashaka kuzahangana na Perezida Museveni kuyobora Uganda mu matora ateganyijwe mu mwaka wa 2021.
Ibitekerezo