Shampiyona y’icyiciro cya mbere mu Rwanda ya Volleyball mu bagabo n’abagore yatangiye mu mpera z’icyumweru gishize aho APR VC mu bagore na Gisagara VC mu bagabo ari yo yegukanye agace ka mbere k’iyi Shampiyona ya Volleyball mu mwaka w’imikino wa 2022/23.

Aka gace ka mbere kakinwe tariki ya 1 Ukwakira mu bagabo i Gisagara ndetse na tariki ya 2 Ukwakira 2022 i Huye mu bagore.

Mu bagabo, Ikipe ya Gisagara VC ni yo yitwaye neza yegukana umwanya wa mbere aho yatsinze REG VC amaseti 3-0 (25-19, 25-14, 25-22).

REG VC yari yageze ku mukino wa nyuma isezereye IPRC Ngoma VC muri ½ ku maseti 3-0 naho Gisagara VC isezerera APR VC ku maseti 3-2 mu mukino utari woroshye.

Mu guhatanira umwanya wa gatatu, APR VC yatsinze IPRC Ngoma VC amaseti 3-0.

Gisagara VC yasoreje ku mwanya wa mbere n’amanota umunani, ikurikirwa na REG VC (7), APR VC (6), IPRC Ngoma VC (5), Forefront VC (4), Kirehe VC (3), IPRC Musanze (2) na KVC (1).

Mu bagore, APR WVC yegukanye icyiciro cya mbere aho yatsinze Forefront VC (iri gukina Shampiyona bwa mbere) amaseti 3-0 (25-18, 25-18 na 25-17) ku mukino wa nyuma.

APR WVC yari yageze ku mukino wa nyuma isezereye RRA WVC ku maseti 3-0 (23-25, 16-25 na 24-26) naho Forefront WVC isezerera Ruhango WVC ku maseti 3-0 (25-18, 25-15 na 25-18).

Mu guhatanira umwanya wa gatatu, RRA WVC yitwaye neza itsinda Ruhango WVC amaseti 3-0 (25-13, 25-13 na 25-16).

Ikipe ya APR WVC yasoreje ku mwanya wa mbere n’amanota arindwi, ikurikirwa na Forefront WVC (6), RRA (5), Ruhango (4), IPRC Kigali (3), IPRC Huye (2) na Ste Bernadette (1).

Agace ka kabiri ka Shampiyona kazakinwa hagati ya tariki ya 15 n’iya 16 Ukwakira 2022 ndetse ishobora gukinirwa mu Mujyi wa Kigali.

Gisagara VC yahize andi mu makipe mu bagabo yegukana agace ka mbere ka shampiyona

APR WVC ni yo yegukanye agace ka mbere ka shampiyona

)