Umuhanzi Jules Sentore umenyerewe cyane mu ndirimbo za Kinyarwanda mu njyana za gakondo, yavukiye mu gihugu cy’u Burundi mu mwaka w’1989 hari nyuma y’uko se yari amaze kwitaba Imana azize impanuka agasiga nyina amutwite afite inda y’amezi atatu.

Nyuma yo kuvuka, Jules Sentore yakuze abaza mama we aho se aba maze arabimusobanurira byose.

Jules yaje kujya kurererwa kwa Sekuru ari we Sentore Athanse, ari na ho yakuriye mbere y’uko bakagaruka mu Rwanda.

Amashuri abanza yayize kuri EP Kacyiru, naho ayisumbuye ayarangiriza mu ishuri rya Academy Solidality mu ishami ry’Amateka, Ubukungu n’Ubumenyi bw’Isi (HEG).

Abajijwe ighe yiyumvisemo impano yo kuririmba, Jules Sentore yabisobanuye muri aya magambo:

“Ubundi mu muryango wacu habamo impano ebyiri, uvutse atazi kuririmba aba azi kubyina; mu gihe rero nari mfite imyaka itanu ni bwo natangiye kwiga kubyina no kwivuga bya kinyarwanda, dukomeza kujya dutarama mu rugo bikagenda neza n’uko nyuma niga kuvuza inanga no kuyibwira (kuririmbi ucuranga inanga).”

Si ibyo gusa kandi kuko inganzo ya Jules Sentore yayikomereje mu rusengero ari na ho yakuye umuhamagaro wo kwinjira mu buhanzi ku buryo bweruye.

Yagize ati: “Nyuma yo kwiga kwivuga no kubyina nakunze kujya mu rusengero aho nari ndi mu itsinda ryitwaga ‘singiza’ ribyina rikanaririmba, ibyo byanteye imbaraga zo gutangira guhanga indirimbo zihimbaza Imana, ariko nza gusanga ko ntazikora zonyine maze nyoboka inzira yo gukora n’izindi ndirimbo zisanzwe za Kinyarwanda mu rwego rwo gushyigikira no gukomeza umuco nyarwanda hamwe no guteza imbere injyana nyarwanda za gakondo.”

Abantu bakunze gutekereza ko abahanzi benshi baba barishwe n’ibiyobyabwenge, bitandukanye na Jules Sentore we si ko abibona kuko biterwa na kamere muntu kuko we ni umukirisito ukunda gusenga kandi icyo ashishikariza abantu bose ni uko igikenewe mu gusenga atari idini umuntu asengeramo ahubwo ari ukumenya ubusabane umuntu agirana n’Imana no kwemera ko Imana yamuremye akayereka ibibazo bye byose.

Reba hano ikiganiro na Jules Sentore

)