Nyuma y’igihe adakinira ikipe ya Kiyovu Sports kuva mu Kwakira 2021 kubera ibibazo yagiranye n’iyi kipe, myugariro Eric Irambona yamaze kugaruka muri iyi kipe aho yanamuhaye ikaze.
Ikibazo cya Irambona Eric na Kiyovu Sports cyatangiye umwaka ushinze aho yahamagarwaga n’ubuyobozi bw’iyi kipe agasabwa kwandika ibaruwa isesa amasezerano agahabwa imperekeza y’amezi 2 undi akababwira ko bidashoboka kuko atari byo biri mu masezerano, hakiyongeraho ko yari ahamagawe ku munsi wa nyuma wo kugura abakinnyi atari bubone aho ari bujye.
Uyu mukinnyi yabonye bidakunze ahitamo kujya ajya ku myitozo hato ngo atazafatwa nk’umukinnyi wataye akazi, abatoza baje kumubwira ko ubuyobozi bwavuze ko atari mu bakinnyi bagomba gukoresha, kuva icyo gihe kugeza uyu munsi nta mukino n’umwe arakinira iyi kipe.
Irambona kandi akaba yari afitanye ikibazo na Kiyovu Sports cy’uko hari amafaranga yivuje iyi kipe itigeze imwishyura.
Tariki ya 1 Gashyantare 2022 abinyujije kuri WhatsApp Status ubwo hizihizwaga umunsi w’Intwari, yagize ati "ku munsi w’Intwari ndasaba buri wese waba ubifitiye ububashaka kumfasha kuva mu karengane (ihohoterwa) ndi gukorerwa na Kiyovu Sports. "
Umunyamabanga wa Kiyovu Sports icyo gihe yabwiye ikinyamakuru ISIMBI ko ikibazo bafitanye na Irambona Eric akwiye gutegereza ibizava mu bujurire bw’akanama gashinzwe imyitarire ka FERWAFA kuko kuvuga ko yarenganye ubu yaba yihuse.
Icyo gihe Omar yavuze ko uyu mukinnyi yatwaye Kiyovu Sports mu kanama gashinzwe gukemura amakimbirane ka FERWAFA mu Gushyingo umwaka ushize ariko aratsindwa ahitamo kujurira agomba gutekereza ibyavuyemo.
Nubwo impande zombi nta n’umwe wabonetse ubwo ISIMBI yageragezaga kubavugisha ngo asobanure uko ikibazo cyarangiye, ariko iyi kipe yagaragaje ko ikibazo ifitanye na Eric Irambona cyacyemutse aho bamuhaye ikaze muri Kiyovu Sports na none, ni mu butumwa banyujije kuri Twitter.
Welcome back #kiyovusports Fam @irambona_eric8 pic.twitter.com/3CX7OvXJGu
— Kiyovu Sports (@SCKiyovuSports) February 25, 2022
Ibitekerezo