Myugariro wo ku ruhande rw’ibumoso mu ikipe ya Kiyovu Sports, Eric Irambona Gisa, aratakambira buri wese ngo ubifitiye ubushobozi amufashe kuva mu karengane arimo akorerwa na Kiyovu Sports.

Ni mu butumwa yanyujije kuri WhatsApp Status ku munsi w’ejo hashize ubwo hizihizwaga umunsi w’Intwari.

Yagize ati "ku munsi w’Intwari ndasaba buri wese waba ubifitiye ububashaka kumfasha kuva mu karengane (ihohoterwa) ndi gukorerwa na Kiyovu Sports. "

Ubwo ISIMBI yageragezaga kuvugana n’uyu mukinnyi ngo yumve uko ikibazo cye na Kiyovu Sports gihageze muri aka kanya, ntabwo byakunze kuko atitabaga telefoni ye ngendanwa kimwe n’umunyamabanga wa Kiyovu Sports, Omar Munyengabe na we ntiyitabaga telefoni ye.

Ikibazo Eric Irambona afitanye na Kiyovu Sports gishingiye ku kuba yarahamagawe n’umuyobozi w’iyi kipe ngo basese amasezerano akanga bitewe n’uko ibyo yahabwaga binyuranyije n’amategeko.

Ibi kandi byiyongeraga ku kuba yarahamagawe ku munsi wa nyuma wo kugura abakinnyi tariki ya 18 Ukwakira 2021, hari mbere y’uko shampiyona ya 2021-22 itangira.

Mu Gushyingo 2021 ubwo yaganiraga n’ikinyamakuru ISIMBI, Irambona yavuze ko yanze gusesa amasezerano bitewe n’uko ibyo yahawe bitari bitari bikurikije amategeko.

Ati "umunsi wa nyuma tuganira barambwiye ngo uze tuguhe imperekeza y’amezi 2, noneho dusese amasezerano, ndababwira nti rero ibyo ng’ibyo ntabwo byemewe mu mategeko ndumva bitashoboka, barambwira ngo ubaze abanyamategeko barakubwira icyo itegeko ry’umurimo rigena, narababajije bambwira ko bitabaho, ngo niba bashaka kugusezerera nibaguhe ibyo bakugomba ubundi mutandukane.”

Uyu mukinnyi yabonye bidakunze ahitamo kujya ajya ku myitozo hato ngo atazafatwa nk’umukinnyi wataye akazi, abatoza baje kumubwira ko ubuyobozi bwavuze ko atari mu bakinnyi bagomba gukoresha, kuva icyo gihe kugeza uyu munsi nta mukino n’umwe arakinira iyi kipe.

Irambona Eric Gisa, yasinyiye Kiyovu Sports amasezerano y’imyaka 2 muri Gicurasi 2020, hari nyuma yo gutandukana na Rayon Sports yari amazemo imyaka 8.

Irambona Eric yasabye uwaba abifitiye ubushobozi kumurenganura

)