Rayon Sports nyuma y’amezi hafi atatu, yafashe umwanzuro wo gusezerera uwari umutoza wayo, Yamen Zelfani kubera umusaruro nkene.
Mu itangazo yanyujije ku mbuga nkoranyambaga zayo, Rayon Sports yavuze ko batandukanye kubera ubwumvikane bw’impande zombi.
Yagize iti "Ku bwumvikane bw’impande zombi Umutoza Yamen Zelfani ntabwo akiri umutoza mukuru wa Rayon Sports."
Bahisemo gutandukana nyuma y’umusaruro utari mwiza yagiye agira, ni nyuma yo gusezererwa na Al Hilal Benghazi ntibabashe kugera mu matsinda ya CAF Confederation Cup aho yashinjwe kuba uburyo yakinishije ari byo byatumye ikipe isezererwa.
Ni nyuma kandi yo kumara imikino 3 yikurikiranya anganya adatsinda aho mu mikino 4 yatsinze umwe wa Gasogi United 2-1, yanganyije na Amagaju 1-1, inganya na Gorilla FC 0-0 ni mu gihe yaraye inganyije na Marines FC 2-2.
Yamen Zelfani ukomoka muri Tunisia yatangajwe nk’umutoza wa Rayon Sports tariki ya 10 Nyakanga aho yari yayisinyiye umwaka umwe.
Yamen Zelfani ni muntu ki?
Yamen Zelfani yavutse tariki 4 Nzeri 1979, avukira muri Tunisia. Yigiye gutoza mu makipe y’abato b’ikipe ya Stade Tunisien y’iwabo. Nyuma yayibereye umutoza wungirije mbere yo kwerekeza muri Saudi Arabia.
Muri Saudi Arabia yatangiriye ubuzima muri Abha Club yo mu cyiciro cya mbere ‘Saudi Pro League’ ari umutoza wungirije nyuma akayitoza ari umutoza mukuru hagati ya 2012-2015.
2015 yagarutse muri Afurika atoza Nouadhibou yo muri Mauritanie ayitoza umwaka umwe mbere yo kwerekeza muri Al-Merrikh yo muri Sudan, aho yatwaye igikombe cya Shampiyona ‘Sudan Premier League 2018-19 n’igikombe cy’igihugu ‘Sudan Cup 2018’.
Mu 2019 yerekeje muri Dhofar FC yo muri Oman ayihesha Super Cup y’icyo gihugu 2019. Mu 2020 yagarutse muri Afurika atoza JS Kabylie yo muri Algeria aho yayifashije kurangiriza ku mwanya wa 3 muri Shampiyona ya Algeria anasohokera iki gihugu muri CAF Confederation Cup.
Mu 2021 yasubiye iwabo muri Tunisia atoza AS Soliman mbere yo gusubira muri Saudi Arabia aho yatoje Al-Kawkab yo mu cyiciro cya kabiri. Yaje mu Rwanda aturutse Al-Talaba yo muri Iraq yatozaga umwaka ushize w’imikino.
Ibitekerezo