![Shampiyona y’abakozi izatwara miliyoni 100 igeze aho rukomeye](local/cache-gd2/eb/a977868ce7862767c2c8e3e9a45add.jpg?1725754785)
Shampiyona y’imikino y’abakozi ya 2023 iteganyijwe kuzagendwaho na miliyoni 100 z’amafaranga y’u Rwanda igeze aho rukomeye aho imikino igeze muri 1/4.
Mu kiganiro n’itangazamakuru cyabaye ejo hashize ku wa Gatatu, Ishyirahamwe ry’Imikino y’Abakozi mu Rwanda (ARPST), ryagaragaje ingengabihe y’iyi mikino ya 1/4 irimo imikino ikomeye.
Ni shampiyona yitabiriwe n’ibigo 55 ni mu gihe umwaka ushize yari 44, bivuze ko hiyongereyemo amakipe 15, ikaba yaratangiye muri Nyakanga uyu mwaka.
Umuyobozi w’Ishyirahamwe ry’Imikino y’Abakozi mu Rwanda, Mpamo Thierry Tigos, yasezeranyije abantu ko bazaryoherwa cyane n’imikino yo guhera muri 1/4 kugeza ku mikino ya nyuma.
Ari “Imikino igeze muri 1/4. Amakipe wavuga akomeye yose yarahageze. Abazareba iyi mikino kugeza ku ya nyuma, bazaryoherwa cyane pe.”
Yakomeje kandi avuga ko bishimira uburyo ibigo bigenda byumva neza intego y’Ishyirahamwe.
Biteganyijwe ko tariki ya 3 na 17 Ugushyingo 2023 ari bwo hazakinwa imikino ibanza n’iyo kwishyura ya 1/4.
Nyuma y’iki cyiciro, hazahita hatangazwa amatariki y’imikino ya 1/2, cyane ko iyi shampiyona izasozwa mu Ukuboza uyu mwaka.
Amwe mu makipe akakaye yageze muri 1/4, harimo RBC, RBA, Rwandair, NISR, MOD, REG n’izindi.
Muri shampiyona y’Abakozi, hakinwa umupira w’amaguru, Basketball na Volleyball mu byiciro byombi. Mu irushanwa ry’Umunsi Mpuzamahanga ry’Umurimo, hakinwamo imikino yindi irimo Koga, Igisoro, Gusiganwa ku Maguru n’iyindi.
![](local/cache-gd2/50/2511f71820224e9a96d189e8603a10.jpg?1725754786)
![](local/cache-gd2/3e/66d6bb06e0c489dda49c623c49b21c.jpg?1725754786)
Ibitekerezo