Mu gikorwa cyo gukusanya ibitekerezo mu rwego kureba ibitagenda neza bigakosorwa, abakinnyi ba Rayon Sports banenze ubuyobozi kutubahiriza amasezerano bagiranye.

Amakuru ISIMBI yamenye ni uko iki gikorwa ku bakinnyi n’abatoza cyabaye iminsi 2 kiba mu byiciro bigeze kuri bitatu, kikaba cyarabereye ku biro by’ikipe ya Rayon Sports biherereye Kimihurura.

Ikaba cyarabaye ku wa Gatatu n’ejo hashize ku wa Kane, ntabwo perezida w’iyi kipe Uwayezu Jean Fidele yigeze ahagaragara ahubwo yakoreshejwe na visi perezida wa mbere Kayisire Jaques na visi perezida wa kabiri Ngoga Roger Aimable.

Ku wa Gatatu abakinnyi bagabanyijwe mu bice 2, kimwe cyaje saa 8h mu gihe igice cya kabiri cyagiyeho saa 10h.

Ku munsi w’ejo hakaba harabaye inama y’abagize staff technique ya Rayon Sports(abatoza).

Amakuru ISIMBI yamenye ni uko ubuyobozi bwabajije abakinnyi icyo babunenga n’icyo babona bahindura.

Mu rwego rwo kwisanzura kugira ngo buri umwe atange igitekerezo kimunyuze nta bwoba, bababahaye impapuro n’ikaramu buri wese ngo yandikeho igitekerezo cye ariko ntashyireho amazina.

Nk’uko umwe mu bari muri iyi nama yabibwiye ISIMBI, byinshi mu bitekerezo byatanzwe ni uko abakinnyi banenze ubuyobozi kutubahiriza amasezerano bagiranye aho batabahembera igihe ndetse bamwe bakaba baranabimye amafaranga baguzwe(recruitment), babasaba kubihindura.

Abakinnyi kandi basabye ubuyobozi ko nk’ikipe ikwiye kuba Gym yayo.

Iki gikorwa ni gahunda ubuyobozi bushya bwa Rayon Sports bwihaye mu rwego rwo kuba icyerekezo 2030.

Hakusanyijwe kandi ibitekerezo by’abafana barenga 100 no ku Cyumweru biteganyijwe ko hari abandi bazabazwa.

Kugeza ubu abakinnyi ba Rayon Sports barishyuza igice cy’umushahara w’ukwezi kwa 12 kuko bahembwe 50% babwirwa ko andi bazayabona vuba, ni mu mpera za Mutarama babwiwe ko guhera muri Mutarama bazajya bahembwa 30% kugeza shampiyona igarutse, n’ukwezi kwa Mutarama bategereje amafaranga yako.

Abakinnyi babwiwe kandi ko bagomba kwitegura kuko shampiyona iri hafi kugaruka aho bababwiye ko ntagihindutse mu kwezi gutaha kwa Werurwe ishobora kugaruka.

Abakinnyi ba Rayon Sports basabye iyi kipe kubahiriza amasezerano

)