Umunyamideli Alexia Uwera Mupende wishwe ku mugoroba wa tariki ya 8 Mutarama 2019, azibukwa mu buryo bwihariye mu gitaramo cya Don Moen utegerejwe i Kigali mu mpera z’iki cyumweru.
Don Moen azagera ku Kibuga cy’indege Mpuzamahanga cya Kigali ku wa Gatandatu tariki ya 9 Gashyantare 2019, azahagera ku gicamunsi hanyuma saa kumi ahite agirana ikiganiro n’abanyamakuru, bucye yitabira igitaramo cy’amateka azakorera muri Camp Kigali ku itariki ya 10 Gashyantare 2019.
Imyiteguro y’iki gitaramo cy’imbonekarimwe irarimbanyije, cyitezweho kuzanyura imbaga y’abakunda umuziki wo kuramya no guhimbaza Imana bazacyitabira.
Muri iki gitaramo hateguwe n’umuhango wo kunamira umunyamideli Alexia Mupende uzibukwa mu buryo bwihariye hakoreshejwe indirimbo ’Lord I Offer You My Life’ ya Don Moen, umwe mu baramyi bamufashaga kwegera Imana cyane.
Ni ibikorwa bizajyana n’iyerekanwa ry’amashusho ya bimwe mu bihe bitazibagirana uyu munyamideli yagize akiriho haba mu kazi ke yakoraga umunsi ku wundi ndetse n’urukundo rwari ruganje hagati ye n’umuryango we.
Mu magambo Mupende Alexia yagiye atangaza ku mbuga nkoranyambaga mbere y’urupfu rwe, yaherukaga kwandika kuri Twitter ko ashaka kwegera Imana birushijeho, ubwo yasubizaga ikibazo cyari kibajijwe n’umuramyi ugiye kuza mu Rwanda, Don Moen, wagiraga ati "Ni iki uri gusengera kandi uri gukorera kugeraho muri uyu mwaka wa 2019?"
Uyu munyamideli yateye intimba benshi... Yishwe yiteguraga gukora ubukwe ku itariki ya 16 Gashyantare 2019, na Allan Rwamo Kweli bari bamaze igihe bakundana ndetse imiryango yarabishimye.
Gusabira Alexia Mupende byabereye kuri Rehoboth Hall i Kanombe hegeranye n’urugo rwabo, aho yiciwe n’abagizi ba nabi. Yashyinguwe i Rusororo ku wa 13 Mutarama 2019 mu muhango wari urimo benshi mu ruganda rw’imideli mu Rwanda baciwe umugongo n’urupfu rwe.
Inkuru bijyanye: Don Moen ategerejwe i Kigali ku wa Gatandatu
Ibitekerezo