Umutoza w’ikipe y’igihugu y’u Rwanda Mashami Vincent yavuze ko yabonanye na Perezida wa Repubulika y’u Rwanda Paul Kagame baganira ku iterambere ry’ikipe y’igihugu aho yavuze ko hari inama yabagiriye zizabafasha mu minsi iri mbere.

Ibi yabitagangarije mu kiganiro n’itangazamakuru ubwo yatangazaga abakinnyi azifashisha mu mikino ya gishuti ibiri iri imbere, Cameroun na Congo Brazaville mu rwego rwo kwitegura igikombe cy’Afurika cya CHAN 2020 kizabera muri Cameroun muri Mata 2020.

Mashami Vincent yavuze ko atakwinjira cyane mu biganiro bagiranye ariko icyangombwa ari uko baganiriye ndetse ibiganiro byagenze neza ndetse akaba yarabagiriye inama nziza zibafasha.

Yagize ati“ni byo koko nabonanye na Perezida, ni ishema ni ibya agaciro, ibyo twavuganye si ngombwa ko nabivugira hano. Icyiza ni uko twavuganye, twagiranye ibiganiro byiza, twagiranye ibiganiro byiza hari inama nziza yatugiriye, ni umuntu ukurikirana cyane umupira w’amaguru kimwe n’indi mikino, twizeye ko hari icyo bizabyara.”

Mashami Vincent yabonanye na Perezida Kagame mu gihe u Rwanda rurimo kwitegura igikombe cy’Afurika cya CHAN kizaba muri Mata 2020, imikino y’amatsinda mu gushaka itike y’igikombe cy’Afurika cya 2021 aho bazakina Cape Verde muri Werurwe 2020.

Perezida Kagame yahuye n'umutoza w'ikipe y'igihugu Amavubi

Mashami yavuze ko inama bagiriwe n'umukuru w'igihugu nibazikurikiza zizabafasha

)