Karim Benzema yahigitse abarimo Sadio Mane yegukana Ballon d’Or ya mbere mu mateka ye (AMAFOTO)
Rutahizamu wa Real Madrid ukomoka mu Bufaransa, Karim Benzema ni we wegukanye Ballon d’Or itangwa na France Football ahigitse Sadio Mane, Kevin De Bruyne na Robert Lewandowski.
Uyu munsi ni bwo hatanzwe ibihembo by’abakinnyi bahize abandi ku mugabane w’u Burayi bitangwa na France Football.
Ni umuhango wabereye mu Mujyi wa Paris aho byatangwaga ku nshuro ya 66, nk’uko byari byitezwe Karim Benzema wafashije Real Madrid kwegukana Champions League ya 2021-22 na Shampiyona ya Espagne ni we waje guhabwa igihembo cy’umukinnyi wahize abandi, Ballon d’Or 2022 ya France Football.
Benzema yatsinze ibitego 44 mu mikino 46 aho yafashije Real Madrid kwegukana Champions League na La Liga mu mwaka w’imikino wa 2021-22.
Lionel Messi (inshuro zirindwi) na Cristiano Ronaldo (eshanu) begukanye iki gihembo inshuro 12 muri 13 ziheruka.
Igihembo cyatanzwe none cyazanywe muri Théâtre du Châtelet mu modoka y’isiganwa n’umupilote w’Umufaransa Esteban Ocon ukina muri F1.
Benzema yabaye Umufaransa wa mbere ugihawe nyuma ya Zinedine Zidane wakimushyikirije, we wagitwaye mu 1998.
Yahigitse umunya-Senegal ukinira Bayern Munich mu Budage ariko umwaka ushize akaba yari muri Liverpool mu Bwongereza, Sadio wanahawe igihembo cya Socrates, ni igihembo cyatanzwe ku nshuro ya mbere kikaba cyaritiriwe umunya-Brazil, Socrates witabye Imana muri 2011, ni mu rwego rwo kumuha icyubahiro, kikaba gihabwa umukinnyi wakoze ibikorwa by’ubumuntu kurusha abandi.
Umubiligi wafashije Manchester City kwegukana shampiyona y’u Bwongereza akanayigeza muri 1/2 cya Champions League, Kevin De Bruyne ni we wabaye uwa 3, ni mu gihe umunya-Poland wahoze akinira Bayern Munich mu Budage ubu akaba ari muri FC Barcelona, Robert Lewandowski wanahembwe nka rutahizamu w’u Burayi yaje ku mwanya wa 4.
Umunyezamu w’Umubiligi ufatira Real Madrid, Thibaut Courtois yahawe igihembo cya "Yashin" gihabwa umunyezamu wahize abandi, akaba yanaje ku mwanya wa 7 mu rutonde rusange.
Pablo Martín Páez Gavira umunya-Espagne w’imyaka 18 ni we wahembwe nk’umukinnyi ukiri muto witwaye neza muri 2021-2022.
Ikipe y’umwaka ikaba yabaye Manchester City.
Mu cyiciro cy’abagore, kapiteni wa FC Barcelona akaba umunya-Espagne, Alexia Putellas ni we wahize abandi yegukana Ballon d’Or, ni igihembo yegukanye ku nshuro ya kabiri yikurikiranya kuko n’umwaka ushize ni we wayegukanye.
Uko abakinnyi bakurikiranye
1. Karim Benzema (Real Madrid, France).
2. Sadio Mane (Bayern Munich, Senegal).
3. Kevin de Bruyne (Manchester City, Belgium).
4. Robert Lewandowski (Barcelona, Poland).
5. Mohamed Salah (Liverpool, Egypt).
6. Kylian Mbappe (Paris St-Germain, France).
7. Thibaut Courtois (Real Madrid, Belgium).
8. Vinicius Junior (Real Madrid, Brazil).
9. Luka Modric (Real Madrid, Croatia).
10. Erling Haaland (Manchester City, Norway).
11. Son Heung-min (Tottenham Hotspur, South Korea)
12. Riyad Mahrez (Manchester City, Algeria).
13. Sebastien Haller (Borussia Dortmund, Ivory Coast).
14. Fabinho (Liverpool, Brazil) anganya na Rafael Leao (AC Milan, Portugal).
16. Virgil van Dijk (Liverpool, Netherlands).
17. Luis Diaz (Liverpool, Colombia) anganya na Dusan Vlahovic (Juventus, Serbia) na Casemiro (Manchester United, Brazil).
20. Cristiano Ronaldo (Manchester United, Portugal).
21. Harry Kane (Tottenham Hotspur, England).
22. Trent Alexander-Arnold (Liverpool, England) anganya na Phil Foden (Manchester City, England) na Bernardo Silva (Manchester City, Portugal).
25. Joao Cancelo (Manchester City, Portugal) anganya na Joshua Kimmich (Bayern Munich, Germany), Mike Maignan (AC Milan, France), Antonio Rudiger (Real Madrid, Germany), Darwin Nunez (Liverpool, Uruguay) na Christopher Nkunku (RB Leipzig, France).
Ibitekerezo